‘Idols’ 2010 beloof weer tonne kykplesier
2010-07-18 09:46
Gauteng - ’n Pragtige blonde langbeen-model met ’n treurige gesinsverhaal, ’n meisie met ’n opera-ma wat sing vir haar pa wat tragies oorlede is, ’n verlamde rolstoelmeisie met groot drome en ’n man met sy kitaar genaamd “Elvis’’ van George wat Mara Louw behoorlik laat huil.
Hierdie is net ’n handvol van die deelnemers in die eerste episode van die sesde seisoen van Idols wat vanaand om 17:30 op M-Net begin.
Boonop is die nasaat van genl. Koos de la Rey, Jan de la Rey Wagener van die Strand wat laas jaar die houtmikrofoon as swakste deelnemer gekry het, ook terug om weer te probeer.
Hy karaoke nou lekker en sing vir mense by die restaurant waar hy werk.
Rapport het na die eerste Idols-episode gekyk wat met die Kaapse oudisies begin het en kykers kan hulle regmaak vir baie meer trane wat uit hartseer én teleurstelling gaan vloei as in vorige jare.
Mense wat dink die betaalkanaal se werklikheidsreeks het ná ses seisoene reeds al die sangtalent ontdek wat daar in die land is, gaan na hul asem snak wanneer hulle sien wat die deelnemers in die eerste episode aanvang en vermag.
Die pragtige langbeen FHM-meisie Adeline Mocke (21) se oë verraai niks van haar hartseerverhaal nie. Haar pa het kanker, maar hy het sy dogter gevra om spesiaal vir hom vir Idols in te skryf.
Wanneer Gareth Cliff en Randall Abrahams die blonde Mocke wil deursit sonder dat sy ’n enkele noot gesing het, wil Mara Louw niks daarvan hoor nie. Bikini-modelle soos Mocke het mos nie gewoonlik suksesvolle sangloopbane nie.
Die trane biggel egter oor Louw se wange toe Jan Hoogendyk, ’n aantreklike kitaartroebadoer met ’n innemende glimlag en ’n baie emosionele storie agter sy naam “Elvis’’, aan die beurt kom.
Om ’n herhaling van laas jaar se stemfiasko gedurende die Idols-eindstryd te voorkom toe al die geldige stemme nie betyds getel is nie, gaan M-Net vanjaar ’n verandering aanbring wanneer Idols se uitstem-programme in September begin.
Die stemtydperk bly dieselfde, maar die uitstem-episode gaan na Dinsdagaande om 19:00 verskuif.
Die bykomende Idols Extra-kanaal begin vanaand om 19:00 op DStv-kanaal 199.