Ibrahim tree op in Suid-Afrika
2012-01-21 06:53
Kaapstad – Abdullah Ibrahim, een van Suid-Afrika se grootste jazzlegendes, sal aanstaande maand ’n konsert in onderskeidelik Kaapstad en Johannesburg aanbied.
Ibrahim tree met ’n orkes van 18 lede op 11 Februarie in die Kaapstadse Internasionale Konferensiesentrum op, en op 17 Februarie in die Linder-ouditorium in Johannesburg.
Ander sterre in die jazz-wêreld, soos Andile Yenana, Feya Faku en Barney Rachabani, sal die verhoog deel, asook internasionaal bekendes soos Tony Koti en Andrae Murchison.
Die konsert heet Senzo, wat “voorouer” in Chinees en Japans beteken. Dit eggo ook die naam van Ibrahim se Sotho-pa, in wie se taal die woord “skepper” beteken.
Ibrahim tel vandag onder die land se mees uitnemende pianiste, en is ’n meestermusikus wat wêreldwyd respek afdwing. Hy is in 1934 in Kaapstad gebore as Adolph Johannes Brand, en het reeds op sewejarige ouderdom klavierlesse begin neem.
Toe hy as 15-jarige sy professionele debuut gemaak het, het “Dollar Brand”, soos hy mettertyd bekend geword het, reeds blootstelling aan ’n wye verskeidenheid musikale invloede gehad. Dit het gewissel van Amerikaanse jazz en township-jive tot Kaaps-Maleise en klassieke musiek. Uit hierdie mengelmoes van style en invloede het Brand oor die jare sy eie, individuele musikale woordeskat opgebou.
In 1959 het Brand saam met Kippie Moeketsi (saxofoon), Hugh Masekela (trompet), Jonas Gwanga (tromboon), Johnny Kotze (bas) en Makaya Ntshoko (tromme) die groep Jazz Epistles begin en die eerste jazz-album deur Suid-Afrikaners opgeneem.
In die sestigerjare het hy en ander musikante die land verlaat en ’n kontrak met die Club Africana in Zürich gesluit. Daar het hulle groot indruk gemaak by onder andere die Amerikaanse ster Duke Ellington, wat gelei het tot die Paryse opname Duke Ellington presents the Dollar Brand Trio.
In 1965 het Brand na New York verhuis. Hy het in 1968 die Islam-geloof aangeneem en sy naam verander na Abdullah Ibrahim.
Afgesien van optredes oor die wêreld heen, was Ibrahim deur die jare ook betrokke by verskeie musiekprojekte.
- Die Burger