Hoopvolles staan tou vir nuwe Survivor-reeks
2010-08-23 06:47
Kaapstad – Sowat 1 000 hoopvolles het Saterdag die koue weer hier trotseer in die hoop om deel te neem aan M-Net se Survivor SA Maldives.
Kaapse oudisies is Saterdag by die River Club in Observatory gehou.
Sowat 150 mense het buite die River Club oornag om oudisies vroegdag af te handel. Die organiseerders moes egter 600 mense wegwys omdat te veel belangstellendes opgedaag het. Saterdag se oudisie het eers Sondag om 01:30 klaargemaak. Later die dag het nog 300 hul oudisies voor 18:00 voltooi.
“Ons soek na ’n verskeidenheid mense wat kan sorg vir ’n interessante dinamiek op die eiland,” het Lani Lombard, bemarkingsbestuurder van M-Net, gesê. Die wenner van die reeks kry R1 miljoen.
Francois Roverch van Vredehoek het die bibberweer in ’n kort oefenbroekie en plakkies aangedurf.
Coco Havana het gesê: “Soos jy kan sien, is ek ’n transseksuele persoon. Dit sou goed wees as die organiseerders iemand soos ek kan insluit, want talle Suid-Afrikaners is nog onkundig wat gay-kwessies betref.”
Enige persoon bo 21 kan inskryf.
’n Kortlys van 60 word saamgestel na afloop van die oudisies in Durban en Johannesburg, wat later gehou word. Daarna word nog onderhoude gedoen om die deelnemers te kies.
Eben Steenkamp van Jeffreysbaai het al die pad Kaap toe gery om 04:00 in die tou in te val. “Ons klomp hier buite is reeds survivors.”
Volg Nuus24 op Twitter
- Die Burger