Honorêre Oscars oorhandig
2009-11-15 08:40
Los Angeles – Die Oscar-toekennings word eers in Maart gehou, maar die eerste goue beeldjies is reeds by ‘n private, deftige geleentheid in Hollywood uitgedeel.
Die Amerikaanse roplrentakademie het tradisie verbreek deur honorêre Oscars weg van die televisieseremonie te oorhandig. Aktrise Lauren Bacall, vervaardiger-regisseur Roger Corman en filmmaker Gordon Willis het Saterdagaand Oscar-beeldjies ontvang by die jaarlikse Goewerneur Toekennings.
Die wenner van vanjaar se Irving J. Thalberg Gedenk-toekenning, vervaardiger John Calley, sou ook sy trofee by die spog-ete ontvang. Al vier ontvangers is deur die akademie se raad gekies.
Annette Bening, Tom Hanks, Kirk Douglas, Anjelica Huston en Quentin Tarantino het as aanbieders opgetree. Meer as 600 genooide gaste het saam gevier by die Grand Ballroom bokant die Kodak-teater, dieselfde lokaal waar die jaarlikse Goewerneursbal ná die Oscar-seremonie gehou word.
Bacall het haar debuut op die grootskerm gemaak teenoor Humphrey Bogart in “To Have and Have Not” in 1944. Sy het daarna in meer as 30 flieks gespeel, insluitend “The Big Sleep” en “Key Largo”.
Corman was al die regisseur van meer as 50 flieks en het meer as 300 flieks in sy loopbaan van vyf dekades vervaardig. Dit sluit in “It Conquered the World” en “The Little Shop of Horrors.”
Willis al twee keer genomineer vir ‘n Oscar vir “Zelig” en “The Godfather, Part III.”
Calley se vervaardigingskrediete sluit in “Postcards from the Edge,” “The Remains of the Day,” waarvoor hy ‘n nominasie gekry het vir ‘n Oscar vir beste fliek, “Closer” en “The Da Vinci Code.”
- AP