Hof verbied Pussy Riot-video

2012-11-29 12:39

Moskou – 'n Hof in Moskou het beslis 'n video van die punkgroep Pussy Riot se optrede in Rusland se hoofkatedraal is ekstremisties en beveel dat dit van die internet verwyder word.

Die groep het betoog teen pres. Vladimir Putin se naderende derde termyn as die land se president.

Drie lede van die groep is vroeër vanjaar skuldig bevind aan boewery, wat gemotiveer is deur godsdienstige haat.

Twee van dié drie is tot twee jaar tronkstraf gevonnis, terwyl die derde lid 'n opgeskorte vonnis opgelê is.

Putin se kritici het die groep se verhoor as 'n politieke vendetta beskryf.

Die hof in Moskou het Donderdag die video van die groep se vertoning in Februarie verbied en gesê dit moet van alle webwerwe verwyder word.
      
– Volg Nuus24 op Twitter

- Sapa - AP