Hoekom is Mej.SA wit? vra kykers
2012-12-24 17:45
Johannesburg – 'n Wit vrou wat Suid-Afrika in die Mej.Heelal-kompetisie verteenwoordig het, was vir sommige kykers verlede week ietwat verwarrend, berig City Press.
Toe die voormalige Mej. SA Melinda Bam verlede Woensdagaand op die Mej.Heelal-verhoog in Las Vegas gestap het, het sy 'n debat op die sosiale netwerk Twitter ontketen.
Haar voorkoms het gesorg vir 'n magdom twiets, meestal van Amerikaanse kykers, tydens die kompetisie wat aanlyn om 03:00 (plaaslike tyd) uitgesaai is.
@AlondraTeresa het gesê: "Toe ek Mej. SA sien, het ek gedink: 'As sy van Afrika af is, hoekom is sy wit?' #meangirlsreference."
@omgitzvanessa het geskryf: "Toe Mej. Suid-Afrika opkom, het my ma gesê: 'Hoekom is sy wit?'"
Die Twitter-gebruiker @theROBbulanSHOW het 'n selfs 'n samesweringsteorie gehad: "Donald Trump haat Obama so baie dat hy 'n wit meisie gekies het om Suid-Afrika in die Mej.Heelal-kompetisie te verteenwoordig."
Diegene wat eintlik iets weet van Suid-Afrika, was geskok oor dié tipe uitlatings. @trashypope het getwiet: "Ek kan nie glo mense wonder eintlik hoekom Mej. SA wit is nie".
Om die verwarring uit te klaar, het @linnyitssn tot die stryd toegetree: "Vir diegene wat dink ons (Amerika) onderwysstelsel werk, mense twiet oor hoe Mej. SA wit kan wees. Om hemelsnaam, lees 'n boek".
Die laaste Suid-Afrikaner wat die Mej. Heelal-kompetisie gewen het, was Margaret Gardiner in 1978.
Mej. VSA, Olivia Culpo, dra die Mej. Heelal-kroon. Die eerste prinses is Mej. Filippyne, Janine Tugonon, en die tweede prinses, Mej. Venezuela, Irene Quintero.
Bam het die toptien gehaal, maar is uitgestem toe die topvyf aangekondig is.
– Lees meer hier
– Volg Nuus24 op Twitter
