Hartseer Moore soek ontvlugting in Hawaii

2011-11-22 09:54

Los Angeles – Die aktrise Demi Moore is glo “broos en alleen” sedert sy aangekondig het sy gaan skei, het mirror.co.uk berig.

Moore het vir ‘n week na Hawaii vertrek vir tyd op haar eie.

Sy het verlede week aangekondig sy en haar man, die Two and a Half Men-akteur Ashton Kutcher, gaan skei.

Dié besluit volg nadat gerugte die ronde gedoen het dat Kutcher op hul sesde huweliksherdenking saam met die 22-jarige Sara Leal by ‘n hotel in San Diego intiem verkeer het.

Volgens ‘n vriend verwerk Moore die egskeiding baie moeilik. 

“Sy is in Hawaii om sielsondersoek te doen. Maar ons is baie bekommerd oor haar.”

Kutcher gaan tans tuis by die Mondrian-hotel in Los Angeles.

– Volg Nuus24 op Twitter.