Harry en Chelsy kuier in Kaapstad
2010-06-25 10:02
Kaapstad - Ondanks gerugte dat Prins Harry en Chelsy Davy se verhouding op die rotste is, is dié glanspaartjie saam in Kaapstad afgeneem.
‘n Fotograaf van Huisgenoot het hulle afgeneem waar hulle intiem kuier by die ultra-modieuse Grand Café & Beach Restaurant naby die Kaapstadse Waterfront.
Die prins, wat saam met prins William hier op ’n liefdadigheids- en Wêreldbeker-besoek was, het die dag voor Engeland se deurslaggewende kragmeting met Slowenië die winterson en seelug saam met Chelsy en ’n onbekende vriendin geniet.
‘n Paar uur later is hulle weer gesien waar hulle oor ’n etenstafel in Kampsbaai se Roundhouse Restaurant vir mekaar koer, berig Huisgenoot.
Die aand het duidelik aan hulle behoort, het ’n ooggetuie aan Huisgenoot gesê met Davy wat glo “nogal vrolik” gelyk het en “alte liefie-diefie met Harry geraak.”
Hul verhouding is wel al deur sy stomende aan-tye en stormagtige uit-tye, en verlede jaar was hulle ses maande lank uit toe Harry op sy weermagloopbaan gekonsentreer het.
Maar in Julie het die liefdesvlam weer hoog gebrand en het die prins so te sê ingetrek by die woonstel van £1,65 miljoen (sowat R18 miljoen) wat Chelsy se pa, Charles, vir haar in die deftige Londense woonbuurt Belgravia gekoop het.
Sien die eksklusiewe steelfoto's van Harry en Chelsy in die Huisgenoot van 1 Julie 2010.
Volg Nuus24 op Twitter
- Huisgenoot