Halle Berry vrees vir haar lewe
2012-02-10 14:15
Los Angeles – Die Oscar-bekroonde aktrise Halle Berry wil na Frankryk trek omdat sy glo vrees vir haar lewe, asook dié van haar driejarige dogter.
Dít volg nadat Robert Dewey Hoskins, die man wat Madonna bekruip het en onlangs uit 'n psigiatriese hospitaal ontsnap het, glo vir Berry ook begin teiken het.
Hoskins is in 1996 tot tien jaar tronkstraf gevonnis en is ná sy vrylating na 'n hospitaal oorgeplaas, waar vasgestel is dat hy 'n "geestelik versteurde oortreder" is.
Hy het Vrydag uit die hospitaal ontsnap, en teiken glo nou vir Berry.
Volgens 'n bron het Berry sekuriteitswagte aangestel wat 24 uur per dag haar huis sal dophou.
Intussen berig E! News dat Berry se gewese bekruiper, Richard Franco, Saterdag 4 Februarie uit die tronk vrygelaat is nadat hy slegs 386 dae van sy vonnis uitgedien het. Berry het ook 'n beskermingsbevel teen Franco gekry wat vir die volgende tien jaar van krag sal wees.
Berry wil glo haar driejarige dogter Nahla saam met haar na Frankryk neem, waar sy met haar verloofde Olivier Martinez wil gaan bly.
– Bang Showbiz.