Groter trop Heuwels pak Wilder as die Wildtuin
2011-06-30 07:29
Kaapstad - Pierre Greeff, Hunter Kennedy, Philip Erasmus en Fred den Hartog, beter bekend as die ouens van Die Heuwels Fantasties, het in Maart hulle tweede album, Wilder as die Wildtuin, bekend gestel.
Die album het ook geskiedenis gemaak toe Fritz Klaaste in April op RSG bekend gemaak het dat Die Heuwels Fantasties die eerste Afrikaanse rockgroep is om die nommer een-posisie te beklee op SAUK se Top 20-verkoperslys. Hierdie lys is reeds 40 jaar oud, wat die prestasie vir hulle ekstra spesiaal gemaak het.
Hulle het hierdie album ietwat anders aangepak as die vorige een, het Pierre tydens ‘n onderhoud by Rick’s Café in Kaapstad aan Nuus24 gesê.
“Die album is as ‘n band in ‘n ateljee opgeneem en dit is maar die ooglopende verskil tussen dié een en die vorige een. Die vorige album het ek en Hunter geskryf op akoestiese kitare en toe na Johnny (de Ridder) gevat, wat dit verder in die ateljee vervaardig het.
Hierdie keer het ons twee ekstra band members gehad. ‘n Voltydse trom- en kitaarspeler in Philip en Fred, en Johnny het steeds die vervaardiging behartig na die tyd,” het Pierre gesê.
As jy die CD-boekie oopmaak, kom jy interessante prentjies van diere teë.
“Die
konsep van die album cover was wilder as die wildtuin. Ons het net ‘n
klomp random goeters vir die grafiese ontwerper gesê. Die concrete jungle tipe ding. So... hy het diere daarop gesit, maar in ‘n stad,” het Hunter gesê.
“Ons het vir hom gesê hy moet dit teken en dis wat dit so cool maak, dink ek.”
Net soos op hulle vorige album het hulle dié keer saam met ‘n paar ander musikante gewerk. Coenie de Villiers is een van hulle.
Pierre reken dit was eintlik heel toevallig dat hulle saam met Coenie gewerk het.
“Ons was op Kwêla, sy geselsprogram, tydens die promosiefase van ons vorige CD. Hy het na die program vir ons gesê hy is ‘n fan. Ons sê toe half grapperig dit sal lekker wees om saam met hom te werk en hy het gedink dis ‘n goeie idee,” het Pierre verduidelik.
“Ons het toe ‘n stukkie musiek geskryf, maar net die koor-gedeelte van Wonder Bo Wonder, en dit vir hom gestuur en hy het daarvan gehou. En ja, siedaar. Hy het die verse geskryf en ons het dit saam vervaardig. Dit is die storie.”
Vir Hunter was dit opwindend om saam met iemand te werk wat gesien word as ‘n “vorige-generasie-musikant”.
“Ondanks die ouderdomsverskil is dit lekker om te sien ‘n mens kom oor die weg as gevolg van musiek,” het hy gesê.
Dit is vir hulle moeilik om te sê of daar iemand is saam met wie hulle nié sal wil werk nie.
“Miskien saam met Robbie Wessels sal ek eendag nog graag wil werk,” het Fred gesê.
“Of Bob Dylan,” was Philip se bydrae.
Weens die sukses van hulle musiek word hulle uiteraard herken as hulle in die strate rondloop.
Pierre vind dit egter nie so erg as mense hom herken terwyl hy in ‘n kroeg kuier saam met sy vriende nie.
“Dit is maar deel van musikant wees. As jy wil hê mense moet moontlik na jou musiek luister, moet jy bereid wees om in die public eye te beweeg. En ons doen dit.
Dit is nie so erg hier soos in ander plekke nie. Ons kry nie kameras wat in ons gesigte gedruk word en sulke goed nie. Mense is gewoonlik baie hoflik en vra dalk vir ‘n handtekening of ‘n foto,” het hy gesê.
Tussen Innibos, Oppikoppi en Skouspel het hulle ‘n reeds besige tydjie wat voorlê, maar dis nie al wat hulle nog hierdie jaar gaan doen nie.
“Ons beplan 'n akoestiese opname en 'n gepaardgaande teaterproduksie en moontlik ‘n DVD ook. Leka,” het Pierre gesê.
- Volg Die Heuwels Fantasties op Twitter en Facebook.
- Volg vir Pierre Greeff op Facebook.
- Besoek Die Heuwels Fantasties se webtuiste vir meer oor hulle.
- Volg Nuus24 op Twitter.