Groot name gaan by Oscars optree
2013-02-21 17:16
Los Angeles – Die Oscar-wenners Russell Crowe, Jennifer Hudson en Catherine Zeta-Jones gaan almal by vanjaar se toekennings optree tydens ‘n huldeblyk aan die herlewing van groot-skerm musiekblyspele, het die organiseerders Woensdag gesê.
Die vertoning sal ook die Les Miserables-akteurs Anne Hathaway en Hugh Jackman insluit.
“Ons is bly dat ons soveel talent bymekaar kon kry om die musiekblyspele van die laaste dekade te vier,” het Neil Meron en Craig Zadan, vanjaar se Oscar-vervaardigers, in ‘n verklaring gesê.
Musiekblyspele het die afgelope dekade ‘n herlewing in Hollywood beleef. Chicago het in 2003 ses Oscars gewen, insluitend die gesogte beste rolprent-toekenning, terwyl Dreamgirls twee Oscars in 2007 ingepalm het.
Die sangeres Hudson het die Oscar vir beste vroulike byspeler vir haar rol in Dreamgirls in 2007 gewen terywl Zeta-Jones dieselfde toekenning in 2003 vir Chicago gewen het.
Crowe, wat ook in Les Miserables te siene is, het die Oscar vir beste akteur vir sy rol in Gladiator in 2001 gewen.
Les Miserables het agt Oscar-benoemings vanjaar gekry.
Die sangers Adele, Shirley Bassey, Norah Jones en Barbara Streisand sal ook by die toekennings optree.
– Volg Nuus24 op Twitter
- Reuters
