Grompot Randall kry meeste stemme van Idols se top-10
2010-09-05 13:07
Rapport
Johannesburg - Randall Abrahams, Idols se mees ondiplomatiese beoordelaar, is die gewildste onder die program se toptien deelnemers.
Die grompot se reguit antwoorde blyk van groot waarde vir die deelnemers te wees.
Rapport het die afgelope week die luukse Idols-huis in Northcliff, Johannesburg, besoek waar die room van die kompetisie tuisgaan.
Vyf van van hulle – Jess Yallup, Sindi Nene, Lloyd Cele, Jamie-Lee Sexton en Bongi Mthombeni – het gesê dat as hulle ’n gunsteling-beoordelaar moes kies, dit Randall sal wees. “Hy gee eerlike, opbouende kommentaar wat ek gebruik om my sterk te maak. Ek vertrou sy oordeel,” sê Bongi.
Volgens Sindi draai hy nie doekies om nie en is sy kennis van musiek ongelooflik.
Boki Ntisme, Pieter West, Gail Nkoane en Adeline Mocke se stem gaan aan Gareth Cliff. “Hy stel jou op jou gemak en het ’n gemaklike manier waarop hy oorkom,” sê Pieter.
Gail beskryf hom as oopkop en iemand wat nie sommer negatiewe kommentaar sal gee nie.
Mara Louw se een stem kom van Elvis Blue. “Sy hou altyd van my,” lag hy.
Vir die deelnemers is die verblyf in die paleis van ’n huis en die hele Idols-ondervinding iets wat hulle nooit sal vergeet nie.
“Ons word baie bederf en eet soos konings – ek voel klaar ’n bietjie knap in my hempies,” spot Pieter.
Die twee getroude manne – Lloyd en Elvis Blue – mis net elkeen hul vrou en kind geweldig baie.
“Alles waardeur ek nou gaan, is die moeite werd, want ek doen dit vir my vrou, Janice, en my seuntjie, Levi,” sê Lloyd. “Ná Idols gaan ek beslis eers baie tyd saam met hulle deurbring voordat ek verder op my musiekloopbaan fokus.”
Elvis Blue erken hy kon nie die trane keer nie toe sy vrou, Chireze, vir hom ’n video stuur van sy agt maande ou dogtertjie, Lila, waar sy begin praat het.
“Haar eerste woord wat sy gesê het, was ‘Pappa’. Ek kon nie help om ’n bietjie te huil nie en ek het oor en oor na die video gekyk.
“Vandat ek in die Idols-huis is, is Skype my beste vriend. Lila klim omtrent binne-in die rekenaar as ek met my vrou gesels,” vertel dié rocker van George.
* Pierre Cloete, kanaalhoof van M-Net, sê dié sesde reeks van Idols is M-Net se grootste tot nog toe. Hy skryf dit grootliks toe aan die talent wat kykers tans sien en hoor.
“Ons getal geldige stemme is ook baie meer as in die verlede, juis omdat spelfoute met deelnemers se name uitgeskakel word.”
Kykers stem nou volgens elke deelnemer se nommer en hoef nie meer ’n naam per SMS te stuur nie.
- Rapport