Green Day-sanger vertel van dwelmmisbruik

2013-02-27 12:57

Los Angeles – Billie Joe Armstrong, voorsanger van die rockgroep Green Day, het erken dat sy misbruik van alkohol en pille hom gedwing het om verlede jaar by ‘n rehabilitasiesentrum aan te klop.

Armstrong het in ‘n onderhoud met Rolling Stone gesê dat hy soms alles sou vergeet wat hy gedoen het.

“Ek kon nie voorspel waar ek teen die einde van ‘n aand sou wees nie,” het die 41-jarige sanger gesê.

“Ek sou in ‘n vreemde huis op ‘n bank wakker word en nie onthou hoe ek daar gekom het nie.”

Green Day moes verlede jaar ‘n toer kanselleer omdat Armstrong in ‘n rehabilitasiesentrum opgeneem is.

Armstrong het gesê hy het eindelik hulp gaan soek ná hy tydens die IHeartRadio-musiekfees in September 2012 sy kitaar stukkend geslaan het omdat iemand gesê het die groep se tyd op die verhoog is verby.

“Die volgende oggend het ek wakker geword en my vrou, Adrienne, gevra hoe erg dit was. Sy het net gesê dat dit baie erg was. Toe bel ek my bestuurder en hy het gesê dat ek dadelik na ‘n rehabilitasiesentrum moet gaan.”

Green Day sal weer einde Maart begin optree.

– Volg Nuus24 op Twitter
 

- Reuters