Grapmaker loop hom vas by Grammy-toekennings

2013-02-13 15:09

Los Angeles – ‘n Oekraïense joernalis en grapmaker is in hegtenis geneem na hy tydens die Grammy-toekenningseremonie op die verhoog gespring het.

Vitalii Sediuk het aan The Hollywood Reporter gesê hy het by die saal ingekom sonder 'n kaartjie, en hy het in die musikant Adam Levine se sitplek gesit.

Beeldmateriaal wys hoe Sediuk op die verhoog begin praat het kort voor die kunstenaar Adele haar Grammy-toekenning moes ontvang. Hy is egter vinnig weggewys deur Jennifer Lopez, wat een van die aanbieders was.

Dit is nie die eerste keer wat Sediuk op dié manier die aandag trek nie. Die akteur Will Smith het verlede jaar die 24-jarige Sediuk geklap na hy probeer het om Smith te soen by die première van Men in Black III in Moskou.

Die polisie in Los Angeles het gesê dat Sediuk eers deur veiligheidswagte aangehou is, waarna hy in hegtenis geneem is. Hy het 'n paar uur in aanhouding gebly, en sal op 4 Maart in die hof verskyn.

– Volg Nuus24 op Twitter
 

- Sapa - AP