Golden Globe-eer vir twee rolprente oor SA
2009-12-16 10:37
Beverly Hills. – Morgan Freeman het Maandag ’n Golden Globe-benoeming as beste akteur ontvang vir sy vertolking van pres. Nelson Mandela in die rolprent Invictus.
Dié drama handel oor Suid-Afrika se triomf in 1995 se Wêreldbeker-rugbytoernooi en die versoenende rol wat sport gespeel destyds het.
Clint Eastwood is ook in die kategorie beste regisseur benoem vir sy regie van dié fliek en die akteur Matt Damon, wat die rol van Francois Pienaar vertolk, is benoem as beste byspeler.
Die wetenskapfiksiefliek District 9, wat in Suid-Afrika vervaardig is, is benoem in die kategorie beste draaiboek.
Die rolprent wat die meeste benoemings gekry het, is Up in the Air met George Clooney as ’n man wat ’n bestaan maak uit die afdanking van mense.
Dit het ses benoemings gekry, waaronder dié vir beste drama.
Die Golden Globes word op 17 Januarie deur die Hollywood Foreign Press Association toegeken.
Ander benoemdes vir beste akteur in ’n drama is Clooney, wie se karakter in Up in the Air gedwing word om sy lewe in oënskou te neem, Jeff Bridges as ’n verloopte country-sanger in Crazy Heart, Colin Firth as ’n man wat selfmoord oorweeg in A Single Man en Tobey Maguire in Brothers.
Benoemings vir beste aktrise in ’n drama is Sandra Bullock vir die voetbalfliek The Blind Side, die veteraan-aktrise Helen Mirren vir The Last Station, Emily Blunt in The Young Victoria, Carey Mulligan vir An Education en die nuweling Gabourey Sidibe in Precious: Based on the Novel Push By Sapphire.
- Reuters