'Gewraakte' konsertgeld aan Christa Steyn geskenk
2012-01-27 10:11
Kaapstad – Die organiseerders van 'n geldinsamelingskonsert wat in Stellenbosch vir die siek pianis en liedjieskrywer Christa Steyn gehou is, het Donderdag bevestig dat die res van die opbrengs van die konsert aan Steyn geskenk is.
’n Oorlog het onlangs losgebars nadat daar beweer is Maniac Music, organiseerders van die konsert, het 'n groot hap van die wins van die konsert geneem.
“Ten einde enige misverstande, onduidelikhede en kwetsende beriggewing in die kiem te smoor en uit die weg te ruim, het ek dit gerade geag om sonder erkenning van aanspreeklikheid ex gratia die gewraakte bedrag aan die Christa Steyn Ondersteuningsfonds te skenk," het Rika Vermeulen van Maniac Music in 'n verklaring aan Nuus24 gesê.
“Ek stel hiermee ten sterkste dat ek geensins met duistere motiewe die konsert gereël het met die bedoeling om munt te slaan uit Christa Steyn se huidige siekte nie,” het Vermeulen bygevoeg.
Van die sangers wat in November gratis opgetree het, was woedend toe dit aan die lig gekom het dat slegs ’n derde van die wins aan Steyn gegee is.
Altesaam 37 kunstenaars soos David Kramer, Valiant Swart, Anton Goosen, Dowwe Dolla en Anna Davel het gratis by die konsert opgetree.
Die Hoër Meisieskool Bloemhof het die perseel vir die konsert gratis beskikbaar gestel.
Die geld sou aan Steyn geskenk word om te help betaal vir die baie duur kankerbehandeling wat sy ontvang. Sy het borskanker wat reeds na die borsholte en lewer versprei het.
Volgens die amptelike inkomste-en-uitgawestaat wat Vermeulen ná die konsert aan die sangers beskikbaar gestel het, was die bruto inkomste R39 402.
Die wins daaruit was R16 902. Dít is verder verdeel: Maniac Music het R5 648 gevat, nog R5 648,89 is aan Anele du Plessis (ook van Maniac Music) betaal vir “organisasie en verhoogbestuur” en net R6 105 is aan Steyn oorbetaal, het Die Burger vroeër berig.
Dit het intussen ook bekend geword dat Steyn selfs minder as die R6 105 wat ná ’n insamelingskonsert deur Maniac Music aan haar uitbetaal is, ontvang het.
Steyn se seun, Douw Steyn, het Donderdag aan Die Burger gesê hy het gedink die volle opbrengs van die konsert gaan na sy ma.
Hy het daarom vooraf R2 000 in Vermeulen se private bankrekening gedeponeer.
“Ek wou graag my dankbaarheid bewys deur te betaal vir Maniac Music se administratiewe uitgawes, soos telefoon-oproepe.
“As jy my ‘skenking’ van R2 000 bytel, het my ma maar R4 105 gekry,” het hy gesê.
– Nuus24
– Volg Nuus24 op Twitter