Gevangenes het talent
2009-11-18 05:48
Johannesburg – Geklee in identiese oranje uniforms het gevangenes in die Pollsmoor-maksimumgevangenis gesing en dans vir die kameras in ‘n nuwe realiteitsreeks waarin hulle aangewys kan word as Jail star.
Die Kaapse tronk het ‘n nuwe televisiereeks van stapel gestuur waartydens hulle gevangenes se verskuilde talente ontbloot. Hierdie projek is deel van ‘n nuwe rehabilitasieprogram.
Dié realiteitsreeks sal landswyd in tronke in Suid-Afrika uitgesaai word.
“Een van die redes waarom ons hierdie projek begin het is om te wys dat gevangenes nie net geweld in tronke aanleer nie. Jail Star gee hulle die kans om weg te kom van hulle eie realiteite,” het Marius Boaden, skepper van die tronk uitsaainetwerk, gesê.
“Ons is reeds klaar met al die opnames. Sowat 35 gevangenes het deelgeneem aan die oudisies. Die konsep van die program is geïnspireer deur programme soos Idols en South Africa’s Got Talent,” het hy gesê.
Die beoordelaars het bestaan uit twee tronkbewaarders en een gevangene.
“Die kompetisie was sterk. Die beoordelaars was eerlik en het soms harde kritiek uitgedeel. Maar die oorhoofse doel was om almal aan te moedig selfs al was hulle nie te goed nie.”
Die bekendstelling van die program is eers uitgestel nadat ‘n oproering in die tronk ontstaan het en ‘n gevangene met ‘n mes gesteek is.
“Wanneer dinge weer rustig raak sal ons die program uitsaai. Die wenner sal dan aangekondig word. Hulle wen nie enige pryse nie, maar kry wel erkenning vir wat hulle bereik het.”
–Sapa