Gestroopte Sting tref steeds sekuur
2012-03-27 08:02
Op 60 het Sting niks om te bewys nie.
En so was sy Back to Bass-konsert Saterdag- en Sondagaand in die Dome in Northriding, Johannesburg – dis deel van sy wêreldtoer – ’n gestroopte ervaring. Sonder die fanfare van voorheen; sonder enige vertoon.
Maar met al die ryklik geskakeerde musikaliteit wat ’n mens van dié Britse pop-rockster in sy wit T-hempie en jeans en met die kort geknipte hare verwag.
Die verhoog was strak, maar wat die ligingenieur met wit lig vermag het, onderstreep die eenvoud en tegelyk die kompleksiteit van dié konsert.
Dit was net in die verwikkelde middeldeel van Roxanne dat bane rooi lig op die verhoog gebruik is.
Reeds sedert die ’70’s bekend as Sting (Gordon Sumner het dié naam een aand vanweë sy gestreepte swart-en-geel jekker gekry en besluit om voortaan so bekend te staan) was hy tot 1984 lid van The Police en akteur in flieks soos The Bride, Plenty en Julia and Julia.
Toe hy in 1985 as Sting sy solo-loopbaan begin vestig het, was dit as sanger aanvanklik sonder ’n baskitaar.
Dié naweek was hy terug met sy getroue (en weliswaar gehawende) baskitare – die een dateer van 1954 en die ander van 1957.
Van meet af aan was dit duidelik Sting gaan sy gehoor gee waarna dié soek: Met All This Time het hy die aand ingelui en vroeg al vervolg met ’n manjifieke weergawe van Englishman in New York.
Die Dome se klank was in die verlede al problematies. Die Sting-span het daarin geslaag om ’n ryk en gebalanseerde klank te bied wat ’n mens nie dikwels in sulke groot konserte teëkom nie.
Dis duidelik dat die lig- en klankmense ewe professioneel as die musikante is.
Die ses musikante saam met Sting op die verhoog was sy jare lange kitaarspeler Dominic Miller, dié se seun Rufus Miller (kitaar), Vinnie Colaiuta (tromme), David Sancious (klawerbord), Jo Lawry (agtergrondstem) en Peter Tickell (elektriese viool). Tickell se vernuf met en beheer van die viool het mateloos beïndruk.
As toegif, net toe ’n mens dink dis alles verby, word ’n voetstoeltjie op die verhoog gedra en Sting kom, akoestiese kitaar in die hand, opgestap vir Fragile. En die digter praat: “Perhaps this final act was meant / To clinch a lifetime’s argument / That nothing comes from violence and nothing ever could...”
– Volg Nuus24 op Twitter.
- Beeld
