George Michael kanselleer Aus-toer weens angs

2012-09-30 10:43

Sydney – Die Britse popsanger George Michael het Sondag sy Australiese toer gekanselleer en het onthul dat hy sukkel met angs nadat hy erge longontsteking gehad het wat hom amper sy lewe gekos het.

Die 49-jarige sê dit het sy hart gebreek om die Australiese been van sy huidige toer te kanselleer. Die toer is verlede jaar uitgestel weens sy longontsteking en sou op 10 November in Perth begin het.

“Sedert verlede jaar se siekte het ek tevergeefs probeer om deur die trauma te werk waaroor die dokters wat my lewe gered het my gewaarsku het,” het Michael in ‘n verklaring van sy promotors gesê.

“Ek was verkeerd om te dink ek kan deur sulke erge angs werk wat my al teister sedert ek Australië verlede  Desember verlaat het.

“Sodra ek hierdie vertonings hier in die Verenigde Koninkryk voltooi, sal ek die behandeling ontvang wat ek lank terug moes gekry het.”

Michael sê dokters het aanbeveel dat hy volkome uitrus en berading ontvang, maar hy “het verkeerdelik geglo as hy musiek maak en daar buite kom om vir die skares op te tree... sal dit genoeg terapie wees”.

Niemin sê hy sy stem het volkome herstel en het bygevoeg “ek dink regtig dat sommige van my onlangse optredes my bestes ooit was”. Tog sê hy daar was moeilike, sielkundige gevolge.

“Ek het ongelukkig onderskat hoe moeilik hierdie jaar sal wees,” het die sanger gesê.

– Volg Nuus24 op Twitter

 

- Sapa - AFP