Geen Grammy-liefde vir Justin Bieber, One Direction
2012-12-07 12:06
Los Angeles – Ontstoke aanhangers van Justin Bieber en die sanggroep One Direction het Donderdag hul misnoeë op sosiale netwerke te kenne gegee nadat dié kunstenaars nie vir Grammy-toekennings benoem is nie.
Die Indie-groep Fun. en die kletsrymer Frank Ocean is bo-aan die lys van benoemdes, terwyl The Black Keys, Mumford & Sons, Jay-Z en Kanye West vir ses toekennings benoem is. Die Recording Academy het egter sommige van die jaar se grootste en kommersieel suksesvolste kunstenaars oor die hoof gesien met die benoemings.
Hoewel die 18-jarige Bieber in November drie Amerikaanse Musiektoekennings ingepalm het, het hy stilgebly oor sy weglating, maar sy bestuurder, Scooter Braun, was woedend.
"Die kind het goed gedoen. Groot, suksesvolle album, uitverkoopte toer en mense oorgewen. Dit is tyd dat hy erken word," het Braun in 'n reeks tweets gesê.
Verskeie van Bieber se 31 miljoen Twitter-volgers het kort daarna ook van hulle laat hoor.
Die Kanadese sanger, wat nog nooit 'n Grammy-toekenning gewen het nie, het in Junie sy album Believe vrygestel. Meer as 1,1 miljoen kopieë is reeds verkoop.
Die Britse sanggroep One Direction is ook nie benoem nie, ten spyte daarvan dat hul debuutalbum Up All Night die eerste plek op die Billboard 200-trefferlys behaal het.
Kaartjies vir die groep se vertonings regoor die wêreld was uitverkoop en hulle het vroeër vanjaar drie MTV Videomusiektoekennings gewen.
Lede van die Recording Academy stem vir die wenners en erken prestasie in 81 kategorieë.
Lady Gaga, die kletsrymer Nicki Minaj en die Suid-Koreaanse popsensasie Psy is ook nie vir die toekenning benoem nie.
Gaga het vanjaar geen nuwe musiek vrygestel nie en op haar wêreldtoer gefokus, terwyl Minaj haar album Pink Friday: Roman Reloaded vrygestel en treffers soos "Starships" opgelewer het.
Die Grammy-toekennings word tydens 'n regstreekse vertoning en seremonie op 10 Februarie in Los Angeles gehou.
– Volg Nuus24 op Twitter
- Reuters
