Gasheer by Oscars loop deur onder kritiek
2013-02-26 11:17
Los Angeles – Seth MacFarlane, gasheer van vanjaar se Oscars, het Maandag onder skerp kritiek deurgeloop oor sy “kru, seksistiese manewales” tydens die toekennings.
MacFarlane, skrywer van televisiereekse soos Family Guy en Ted, is in verskeie publikasies vir sy grappe en kommentaar gekritiseer, en die seremonie self was ook nie na almal se smaak nie.
“Wel, dit het nie gewerk nie,” het die Los Angeles Times se kritici oor die Oscars gesê.
“Ten spyte van die dapper pogings van Adele, Barbra Streisand en die pittige Daniel Day-Lewis, was die seremonie lank... en vervelig.”
MacFarlane is aangestel in ‘n poging om die Oscars se soms ouderwetse beeld 'n hupstoot te gee.
Kritici het veral MacFarlane se opening uitmekaargetrek, en gesê dit was te lank, en het te veel na homself verwys.
Die liedjie We Saw Your Boobs, wat tydens die seremonie gespeel is, het ook erg deurgeloop. MacFarlane sing in dié liedjie oor aktrises wat al naak in rolprente verskyn het.
“As jy gisteraand se Oscars gekyk het beteken dit jy het deur kru, seksistiese manewales gesit,” is in The New Yorker geskryf.
“Dit was onaangenaam en suur.”
– Volg Nuus24 op Twitter
- Sapa - AFP
