'Gangnam Style'-ster jammer oor Amerika-liedjies
2012-12-08 14:44
Los Angeles – Die Suid-Koreaanse popsanger Psy, wat bekend is vir sy treffer "Gangnam Style", het om verskoning gevra vir vorige konserte waar anti-Amerika-lirieke gesing is.
Dit kom voor 'n optrede die vakansie wat pres. Barack Obama en sy gesin sal bywoon.
Psy het die verskoning uitgereik nadat die Amerikaanse media Vrydag berig het oor sy deelname in twee vertonings in 2004 waarin die Amerikaanse weermag gekritiseer is.
Die sanger se "Gangnam Style" pop- en dansvideo is reeds meer as 900 miljoen keer op YouTube gekyk sedert dit in Julie opgelaai is.
"Terwyl ek dankbaar is vir die vryheid om myself uit te druk, het ek geleer daar is beperkings op watter taal gepas is en ek is diep jammer vir hoe die lirieke dalk geïnterpreteer is," het hy in 'n verklaring gesê.
"Ek sal vir ewig jammer wees vir enige pyn wat ek deur daardie woorde veroorsaak het."
In een vertoning, wat Psy sê was agt jaar gelede, het hy teen die dood van twee Suid-Koreaanse tienermeisies betoog. Dié meisies is raakgery deur 'n Amerikaanse voertuig wat in die land gestasioneer was.
In 'n ander vertoning het Psy die Amerikaanse inval en besetting van Irak gekritiseer. Suid-Koreaanse magte het ook aan dié besetting deelgeneem.
Psy sal na verwagting by die jaarlikse Christmas in Washington-konsert optree. Die Withuis het Vrydag gesê Obama en sy gesin sal die konsert bywoon.
Die uitsaaier TNT het gesê Psy se vertoning sal, soos beplan, voortgaan.
– Volg Nuus24 op Twitter
- Reuters
