Koerant sal hof toe oor Zuma-skildery

2012-05-18 12:31

Johannesburg – Die Johannesburgse Goodman Gallery gaan nie die omstrede skildery van pres. Jacob Zuma met sy gulp oop en sy penis blootgestel verwyder nie omdat dit sensorskap gaan wees.

"Ons voel dit is sensorskap om die skildery te verwyder," het Lara Koseff, woordvoerder van die galery, Vrydag gesê.

Die ANC het vroeër 'n brief van hul prokureurs aan die galery gestuur en geëis dat die skildery verwyder word. Die regerende party wil ook hê dat 'n foto van die Brett Murray-skildery getiteld "The Spear" van City Press se webwerf verwyder word.

Die koerant weier om die foto van hul webwerf te verwyder en het gesê hulle laat die besluit aan 'n hof oor.

Volgens Koseff het hul prokureurs die ANC ingelig dat die skildery nie verwyder gaan word nie. Die galery het hul kunstenaars gedurende en na die apartheid bygestaan, en ondersteun hulle steeds.

Hoewel die opinies van die kunstenaars nie dié van die galery is nie, verwelkom die galery gesprekke wat werke soos Murray s'n teweegbring.

Besoekertalle het aansienlik vermeerder sedert die ANC geëis het dat die skildery verwyder word. 'n Wag met 'n koeëlvastebaadjie is by die deur aangestel as 'n voorsorgmaatreël.

Volgens Koseff was die president nog nie by die galery om die skildery te sien nie, maar Paul Mashatile, minister van kuns en kultuur, het wel gebel om sy kommer uit te spreek.

Die galery en die minister het ingestem om mekaar te ontmoet om die kwessie te bespreek.

– Volg Nuus24 op Twitter.

- SAPA