Freshlyground laat hul vir MIV toets
2010-05-05 10:24
Kobus Pretorius, Die Burger
Kaapstad
Hoe meer mense weet wat hul MIV-status is, hoe beter is dit vir die MIV-situasie in die land.
Met dié boodskap het die lede van die Suid-Afrikaanse musiekgroep Freshlyground hulle gister vir die MI-virus by die Desmond Tutu-stigting se mobiele Tutu Tester laat toets.
Die Tutu Tester, wat die afgelope twee jaar meer as 15 000 mense getoets het, het gister langs die Houtbaai-polisiestasie stelling ingeneem om die gemeenskap te bedien.
Die diens, waar mense ook vir diabetes, bloeddruk en tuberkulose getoets kan word, is gratis.
Dit was die tweede keer dat Freshlyground se lede by die Tutu Tester getoets word nadat hulle in 2008 by die bekendstelling betrokke was.
Volgens Simon Attwell (fluit) voel die groep dit is ’n goeie tyd om hulself opnuut tot die openbare MIV-toets te verbind.
“Dit is baie belangrik dat mense hulself laat toets omdat daar so ’n stigma rondom MIV bestaan.
“Meer openbare figure moet hulself laat toets om die boodskap uit te kry,” het Kyla-Rose Smith (viool) gesê.
Attwell het gesê die feit dat pres. Jacob Zuma onlangs sy status bekend gemaak het, is ’n indrukwekkende begin tot die veldtog om mense meer bewus te maak.
“Ons wil nie net die mense daar buite bewus maak nie, maar ook ander invloedryke mense wat ook ’n voorbeeld kan wees.”
Attwell meen die uitslag van jou MIV-toets bepaal jou optrede. “Om te weet wat jou status is, is die enigste manier om die probleem aan te spreek.
“Dit is beter om te weet as om nie te weet nie.”
Intussen het die groep pas hul nuutste album, Radio Africa, waaraan hulle in Amerika gewerk het, bekend gestel.
Die groep het ook saam die internasionale ster Shakira die liedjie “Waka Waka (This Time for Africa)” vir die Wêreldbeker-sokkertoernooi opgeneem.
- Die Burger