Fliekgangers trek neus op vir 3D
2011-12-22 09:01
Hollywood, Los Angeles – Twee jaar ná die uitreiking van die 3D-treffer Avatar sukkel Hollywood steeds om dié tegnologie ten beste in te span.
Fliekgangers het intussen gewoond geraak aan die nuwigheid om flieks in drie dimensies te kyk en raak moeg vir die irriterende bril.
Die jaar eindig wel met ’n paar 3D-flieks wat goed ontvang is, waaronder Steven Spielberg se vakansietreffer Tintin en Martin Scorsese se Hugo.
Kenners sê egter fliekmakers kan nie meer net staat maak daarop dat ’n fliek in 3D is om mense sover te kry om ekstra geld daarvoor uit te haal nie.
Jeff Bock, ’n loketontleder, het aan AFP gesê 2011 het ’n paar waardevolle lesse aan fliekmakers geleer. “Gehore wil nie meer vir 3D betaal as dit nie ook ’n uitstekende fliek is nie,” sê hy.
Die 3D-revolusie kom te midde van die fliekbedryf se pogings om homself te vernuwe terwyl die maniere waarop flieks gekyk kan word vermeerder.
Tekens dat die 3D-bedryf swaarkry, is nie net duidelik uit die loketmislukkings van flieks soos Fright Night, Conan the Barbarian, Glee en Spy Kids nie, maar ook in die dalende verkope van 3D-televisies. Marknavorsing dui aan die prys van dié TV’s en die dra van ’n bril skrik mense af. 3D-flieks wat in 2012 uitgereik sal word, sluit in Men in Black III, The Amazing Spider Man, The Avengers en The Hobbit.
Maar die fliek wat waarskynlik die meeste mense na die teaters gaan lok, The Dark Knight Rises, sal slegs in 2D uitgereik word.
“Wat sê dit vir jou?” vra Bock. “Dit gaan altyd allereers oor die storie.”
Volg Nuus24 op Twitter.
- Beeld