Filmbase tjoepstil oor Charlize se nuwe fliek
2012-02-10 13:09
Kaapstad – Die nuwe rolprent Mad Max 4: Fury Road, met die Suid-Afrikaanse aktrise Charlize Theron en die Brit, Tom Hardy, in die hoofrolle, sal in die Namib-woestyn verfilm word, het die Republikein berig.
Volgens berigte wou lede van die film se produksiespan egter geen besonderhede oor die rolprent en produksie verskaf nie, omdat alle betrokke partye ooreenkomste van vertroulikheid onderteken het.
’n Suid-Afrikaanse produksielid het egter gesê spesiale veldvoertuie is onlangs van Australië na Suid-Afrika verskeep, waarna dit sowat drie weke gelede na Namibië gebring is. Dis egter nie duidelik of die motors reeds hier is nie. Die veldvoertuie is deur Ford Australië se navorsingsentrum ontwerp.
Die rolprent, wat produksielede van Amerika, Suid-Afrika en Namibië betrek, sal na verwagting tot 500 werksgeleenthede skep.
Intussen heers kommer steeds onder omgewingsaktiviste oor moontlike skade wat die verfilming aan die ekologies sensitiewe Dorob Nasionale Park kan aanrig.
Volgens bronne sal ’n vergadering binnekort oor die kwessie gehou word, hoewel geen datum al vasgestel is nie.
– Volg Nuus24 op Twitter.
