Ferdinand Rabie gaan pa word
2012-02-09 09:01
Kaapstad – “Sy is die mooiste swanger vrou wat ek nog ooit gesien het. Sammy is gesond en beautiful!”
Dít is hoe die Kaapse sakeman Ferdinand Rabie die ma van sy eersteling beskryf.
Rabie (37), wenner van Suid-Afrika se eerste Big Brother-realiteitsreeks, en Samantha Swartz verwag hul eersteling – ’n seun – in Junie.
“Sammy was nog altyd gereed vir ’n kind. Sy is wonderlik en ons gaan volgende week vir ’n toets,” het hy gesê.
Die paartjie is al langer as ’n jaar saam.
Gevra of hulle reeds ’n naam gekies het, het Rabie geantwoord; “Nee jong, ek weet nie. Hy moet kom en wanneer hy sê hoezit, sal ons vra hoezit en dan sal ons weet.”
Swartz, van Bloemfontein, het Woensdag ’n blaaskans gevat en die praatwerk vir Rabie gelos.
“Ek haal my hoed af vir enige swanger vrou in dié hitte. Ek weet nie hoe hulle dit hanteer nie,” het hy gesê.
Volgens Rabie wou hulle nie ’n verrassing hê nie en het vroeg die geslag van die baba uitgevind.
“Dit is moeilik om babaklere te koop. Netnou koop ons alles pienk en dan moes dit blou gewees het,” het hy gesê.
Hy het bygevoeg dat hy ook geen voorkeur het oor sy seun se buitemuurse aktiwiteit nie, “solank hy net genoeg balle het om mee te speel”.
– Volg Nuus24 op Twitter
- Die Burger