Fees van koormusiek weergalm dié naweek in Gauteng
2010-07-28 10:13
Beeld
Die Ihlombe!-koorfees word die naweek op verskeie plekke in Gauteng gehou met verskeie konserte van Soweto tot Pretoria, asook twee daglange simposiums.
Die fees word jaarliks aangebied deur die Amerikaanse organisasie Classical Movements.
’n Soortgelyke program sal op Saterdag 7 Augustus in Kaapstad by die Universiteit van die Wes-Kaap aangebied word.
Die fees sluit in die betrokkenheid van 36 koordirigente en daar is 15 werksessies en 11 konserte met altesame 2 000 mense wat sal optree.
Plaaslike kore sal geldelike bystand kry uit die verkope van die konsertkaartjies.
Afrigters en musici sal veral by die werksessies baat vind, terwyl die konserte geskik is vir almal wat van koormusiek hou.
Kaartjies vir die werksessies kos R75 en kaartjies vir die optredes van R50 tot R100. Valerie by 0 072 422 6819 het meer inligting.
Die openingskonsert vind Vrydagaand om 19:30 plaas in die Regina Mundi-kerk in Soweto en die beraad begin Saterdag om 09:00 in die ZK Matthews-saal in Muckleneuk, Pretoria.
Daar is konserte om 11:30, 14:30 en ’n aandkonsert om 19:30.
Sondag verskuif die beraad na Johannesburg in Wits se Grootsaal.
Die konsert van die dag is om 17:00.
Die konserte in Kaapstad is op 7 Augustus om 11:30, 14:30 en 19:30.
Meer inligting is by www.classicalmovements.com/s_af.htm.
- Beeld