Fees van eietydse en ou flieks in Centurion
2011-08-13 07:54
Centurion – Die iMPAC-rolprentfees vind dié naweek by die Open Window-kampus in Centurion plaas en belangstellendes in flieks en die geskiedenis daarvan behoort veral die George Méliès-program môreaand interessant te vind.
Hierdie program word aangebied om die geboorte van Méliès 150 jaar gelede te gedenk.
Méliès (1861-1938) was gefassineer deur flieks sedert hy die Lumière-broers se eerste fliekvertoning op 28 Desember 1895 gesien het.
Hy het kort daarna sy eie kameraprojektor gebou en net ’n paar maande later sy eerste eie fliek vertoon.
Hy word alom beskou as die vader van spesiale effekte.
Méliès het toevallig agtergekom die kamera kon gebruik word om tyd en ruimte te verwring toe sy kamera eendag gestol het tydens verfilming. Daarna het hy hom toegespits op die skepping van komplekse spesiale effekte.
Hy het in sy leeftyd meer as 500 flieks gemaak deur dit te finansier, regisseer, verfilm en in byna elkeen daarvan te speel.
’n Vertoning van ses kortflieks môreaand om 18:30 sal ’n fassinerende blik bied op die begindae van rolprente. Dié flieks is The Man with the Rubber Head (1901), A Trip to the Moon (1902), The Impossible Voyage (1905), The Diabolic Tenant (1909), The Merry Frolics of Satan (1906) en The Conquest of the Pole (1912).
Dié stilflieks sal as begeleiding die musiek van die Rotoscope-orkes hê onder leiding van die plaaslike kunstenaar Magalela Mtshali. Kaartjies vir die vertoning, wat sowat ’n anderhalfuur duur, kos R60.
Die rolprentfees is een van die projekte van die iMPAC-inisiatief wat die fliekbedryf in Afrika wil bevorder.
Flieks van die Open Window-studente sal as deel van die fees vertoon word.
Ander hoogtepunte sluit in ’n vertoning van die meesterlike Ethiopiese fliek Night of Counting the Years vandag om 17:00.
Die 1927-stilfliek Sunrise deur die Duitse fliekmaker F.W. Murnau word vanaand om 20:00 vertoon. Murnau is destyds na Hollywood genooi met die opdrag dat hy totale artistieke vryheid kon geniet met enige projek wat hy wou aanpak. Sunrise was die resultaat.
Die kontemporêre klankkunstenaar Jacob Israel en die klankbaanargitekte A Skyline on Fire het ’n oorspronklike klankbaan vir die fliek geskep wat lewendig uitgevoer sal word.
Daar is ook ’n skaduteatervertoning, Yanagi/Dragonface, môre om 12:00 vir volwassenes.
Vir meer inligting oor die program besoek www.impac.co.za.
Kaartjies is beskikbaar om al die nommers van die naweek by te woon teen R300 en ’n dagkaartjie kos R120. Toegang kan ook per nommer betaal word (sien die webblad vir pryse).
Studente kry 50% afslag met die vertoon van ’n geldige studentekaart.
* Bespreek by Louise Malan by 074 151 0926 of stuur e-pos na louisemaln@gmail.com.
* Die Open Window-kampus is in John Vorsterrylaan in Southdowns, Centurion.
- Beeld