Farrow gaan in diamant-verhoor getuig
2010-07-31 04:18
Den Haag – Die aktrise Mia Farrow en Carole White, die modelagent, gaan in die volgende maand oor ‘n bloeddiamant getuig, wat glo deur die Liberiese leier Charles Taylor aan Naomi Campbell gegee is.
Die twee vroue se name is op ‘n lys van getuies vir Maandag 9 Augustus.
Volgens dié dokument sal White se getuienis sowat twee ure neem en Farrow s’n een uur.
Albei vroue het ingestem om te getuig oor die geskenk wat laat in die aand aan Campbell gegee is. Sy het dit in 1997 ontvang tydens ‘n ete wat deur oudpres. Nelson Mandela gereël is.
Campbell is gedagvaar om oor die gebeure te getuig, nadat sy geweier het om vrywillig met staatsaanklaers te praat. Sy sal volgende Donderdag in die getuiebank in Den Haag wees.
Die 62-jarige Taylor word daarvan beskuldig dat hy diamante na Suid-Afrika geneem het om wapens te koop. Hy ontken dié aanklag ten sterkste.
White en Farrow, wat ook Mandela se ete bygewoon het, beweer hulle het bewyse wat kan staaf dat Campbell ‘n diamant vanaf Taylor ontvang het.
White het aan staatsaanklaers gesê sy was teenwoordig toe die diamant oorhandig was, terwyl Campbell vir Farrow glo die volgende oggend van die geskenk ingelig het.
- Volg Nuus24 op Twitter.
- SAPA