Expendables 2 vaar die beste by loket

2012-08-20 09:28

Los Angeles – Die aksie-fliek Expendables 2 was die topverkoper in sy openingsnaweek in Amerika en Kanada.

Expendables 2 het $28,8 miljoen (sowat R239 miljoen) oor die naweek verdien, het sy verspreider Lions Gate Entertainment bekend gemaak.

Die fliek is ‘n opvolg van die 2010 treffer met Sylvester Stallone en Arnold Schwarzenegger wat saam verskeie ander aksie-sterre in die fliek verskyn.

Verlede week se topverkoper, The Bourne Legacy met Jeremy Renner, het een plek afgeskuif en is nou in die tweede posisie.

In die derde plek was die 3D-fliek ParaNorman, wat sowat $14 miljoen (sowat R116 miljoen) verdien het. Die fliek handel oor ‘n seuntjie, Norman, wat met spoke en geeste kan praat en sy dorp probeer red van zombies.

Die fliek is deur dieselfde span vervaardig wat verantwoordelik was vir die 2009 treffer Coraline.

 – Volg Nuus24 op Twitter

- Reuters