Emperors Palace lig vermaakpot se deksel
2011-12-21 08:02
Johannesburg – Rockgroepe, kabarette en akrobatiese vertonings is van die hoogtepunte wat voorlê op Emperors Palace se 2012-kalender.
’n Splinternuwe kabaret, Retro Fever, open in Januarie in die Odeon Showbar. Dit is geregisseer en vervaardig deur Rob Pucci en die span sal die gehoor neem op ’n musikale reis van die grootste treffers van die 1970’s, ’80’s en ’90’s.
Kaartjies kos R65 per persoon en kan by die deur gekoop word. ’n Komplimentêre skemerkelkie is ingesluit. Retro Fever is te sien van 13 Januarie tot 14 April (slegs op Vrydag- en Saterdagaande).
Die gewilde Suid-Afrikaanse rockgroep The Parlotones is op 19 en 20 Januarie op die verhoog van die Theatre of Marcellus om hul grootste treffers te kom sing. Kaartjies kos van R215 per persoon.
As deel van die vieringe van die Chinese Nuwejaar sal China se nasionale akrobatiese span – wat al meer as 45 goue medaljes verower het en in 113 lande opgetree het – die gehoor kom betower met hul ongelooflike toertjies in hul vertoning Chinese Marvels.
Hulle tree vir die eerste keer in Suid-Afrika op en is te sien in die Theatre of Marcellus van 27 tot 29 Januarie. Kaartjies kos van R175 per persoon.
Die plaaslike kunstenaar Zahara is ook in die Theatre of Marcellus op 3 en 4 Februarie. Sy sal treffers sing van haar platinum-debuut, Loliwe.
Zahara is bekend om haar mengsel van soul, folk en tradisionele musiek. Kaartjies kos van R115 elk.
Vir fietsry-geesdriftiges lê die 2012 Asca Emperors Palace Cycle Classic voor van 4 tot 6 Februarie. Dit sal die agtste keer wees wat dié uithouren aangebied word en dit bied ’n naweek se vermaak en meer as R50 000 se prysgeld. Meer inligting hieroor by 0011 662 2494 of stuur e-pos na events@cyclingnews.co.za.
Die begin van ’n nuwe jaar beteken ook dat Nataniël terugkeer na die Theatre of Marcellus met sy jaarlikse produksie hier.
In 2012 is hy te sien in Black White Man Woman. Hy het verlede jaar sy C-trilogie (Corona-tion, Cathedral en Combat) afgesluit en in sy nuwe produksie kyk hy na al die lewe se grys gebiede in ware Nataniël-styl. Die speelvak duur van 16 Februarie tot 25 Maart. Kaartjies kos van R140 per persoon.
*Alle kaartjies kan bespreek word by die Emperors Palace-loket by 011 928 1297/1213 of by Computicket.
- Beeld