Elton John in hof oor 'gesteelde' lirieke

2012-04-27 15:35

Los Angeles – Elton John bevind hom in 'n regspenarie ná 'n selfverklaarde "bekroonde" fotojoernalis en liedjieskrywer 'n saak teen hom aanhangig gemaak het omdat die skatryk sanger glo die lirieke van die trefferliedjie "Nikita" by hom gesteel het, berig die vermaaklikheidswebwerf TMZ.

Die man agter die aantygings, ene Guy Hobbs, het die saak in 'n hof in Illinois aanhangig gemaak.

Hy beweer hy het die liedjie "Natasha" in 1982 geskryf ná 'n verhouding met 'n Russiese kelnerin op 'n toerskip. Drie jaar later het Elton John se liedjie "Nikita" verskyn.

Volgens die hofdokumente het Guy die liedjie aan verskeie publiseerders gestuur, onder andere Big Pig, wat Elton John se liedjies publiseer.

Hy het nooit enige terugvoering ontvang nie, maar Elton John se "Nikita," wat in 1985 die lig gesien het, herinner glo sterk aan sy liedjie.

Elton John het nog nie op die aantygings reageer nie.

– Lees hier meer.

– Volg Nuus24 op Twitter.