Elton John gekap oor China-vertoning

2012-11-28 12:55

Beijing – 'n Dagblad in China het Woensdag die popster Elton John veroordeel omdat hy sy vertoning in Beijing aan die visuele kunstenaar en politieke aktivis Ai Weiwei opgedra het.

Die dagblad het gesê dit is minagtend en kan veroorsaak dat ander Westerse kunstenaars verbied word om in die land op te tree.

"John se onverwagte aksie was minagtend teenoor die gehoor en die kontrak wat hy in China onderteken het," het die Global Times in 'n hoofartikel gesê.

"Hy het politieke inhoud by die konsert gevoeg, wat niks minder as 'n vermaaklikheidsvertoning moes wees nie."

Die 55-jarige Ai is 'n wêreldbekroonde visuele kunstenaar en is uitgesproke in sy kritiek op die Chinese regering.

Hy is verlede jaar 81 dae lank in die tronk aangehou en later veroordeel op grond van belastingbedrog. Hy is 'n boete van $2,4 miljoen (sowat R21 miljoen) opgelê en is 'n jaar lank verbied om die land te verlaat.

"John se optrede sal veroorsaak dat die relevante agentskappe in die toekoms huiwerig sal wees wanneer hulle buitelandse kunstenaars nooi," lui die artikel verder.

Die ikoniese Grammy-bekroonde kunstenaar sal na verwagting volgende week na China terugkeer vir 'n vertoning in die suidelike stad Guangzhou.

Kaartjies vir dié vertoning is steeds te koop en die promotor het aan AFP gesê hy is nog nie van enige kansellasie in kennis gestel nie.

Die Global Times het gesê: "Chinese gehore moenie huiwer om teen die provokateur te betoog en hom uit te jou nie".

Ai het die hoofartikel verwelkom, omdat sy naam weinig in die staatsbeheerde media genoem word.

– Volg Nuus24 op Twitter

- Sapa - AFP