Ek sal eendag 'n Grammy wen – Bieber

2012-12-14 17:44

Los Angeles – Die popsanger Justin Bieber is teleurgesteld omdat hy nie vir 'n Grammy-toekenning benoem is nie, maar hy is vol vertroue "dat dit eendag sal gebeur".

Bieber is verlede jaar vir twee toekennings benoem, maar hy is oor die hoof gesien toe die benoemings verlede week bekend gemaak is. Sy bestuurder, Scooter Braun, en die musiekbaas Simon Cowell was ook ontsteld omdat hy nie benoem is nie.

Die sanger het erken dat hy gehoop het om die kortlys te haal, maar hy is seker dat hy eendag 'n Grammy-toekenning sal inpalm.

"Dit was 'n groot teleurstelling. Ek het uitgesien na moontlike Grammy-benoemings, maar ek weet dit sal eendag gebeur. Ek is so jonk, ek is net 18. Ek is net so geseënd om elke dag te kan doen waarvoor ek lief is," het hy aan die kletsprogramaanbieder Ellen DeGeneres gesê.

Die toekenningseremonie word op 10 Februarie in Los Angeles gehou.

– Lees meer hier

– Volg Nuus24 op Twitter