Eerste Mnr. Gay Namibië geskors
2012-11-26 12:11
Windhoek – Die heel eerste Mnr. Gay Namibië, Wendelinus Hamutenya, se kroon is Saterdag, ses dae voor sy termyn verstryk, afgeneem, het die Republikein se webtuiste Maandag berig.
Hamutenya is van sy 2011-titel ontneem nadat dit onder die aandag van die Mnr. Gay Namibië-organisasie gekom het dat hy van onbetaamlike gedrag beskuldig is, volgens 'n mediaverklaring wat die organisasie Saterdag uitgereik het.
"Weens die ernstige aard van die bewerings teen hom, het die Mnr. Gay Namibië-organisasie geen keuse as om hom met onmiddellike effek op 24 November te skors nie, hangende die uitslag van die ondersoek," lui die verklaring.
'n Woordvoerder van Mnr. Gay Namibië, Chris de Villiers, het aan Republikein gesê hy kan geen verdere inligting oor die aangeleentheid verskaf nie.
"Daar is 'n klag teen Hamutenya in Johannesburg gelê. Dit is 'n baie ingewikkelde situasie en dit kom op 'n baie slegte tyd," het hy gesê.
Lees verder.
Volg Nuus24 op Twitter.
– Republikein
