Eastwood-film nie in Japan gewys
2011-03-16 12:58
Los Angeles – Clint Eastwood se fliek, Hereafter, sal voortaan nie in Japannese teaters gewys word nie nadat ‘n dodelike aardbewing en reuse-tsoenami dié land getref het, het Warner Bros besluit.
Die rede vir Warner Bros se besluit is omdat dié film tonele van die tsoenami wys wat die Indiese Oseaan in 2004 getref het. Altesaam 230 000 mense is in die tsoenami dood.
Die huidige dodetal in Japan word op 2 400 beraam, maar daar word berig dat ongeveer 10 000 mense gesterf het. Duisende mense word steeds vermis.
Volgens Satoru Otani, ‘n beampte van Warner Bros, is Hereafter se verskriklike tsoenami-tonele nie geskik op hierdie tydstip nie.
Die film het laat in Februarie in Japan begin draai en sou tot einde van die maand in teaters te sien wees.
Die filmmaatskappy het ook die vrystelling van die film, The Rite, waarin Anthony Hopkins speel uitgestel. Dit sou hierdie naweek in bioskope begin draai het.
"Met die tragiese natuurrampe wat in Japan gebeur het, gaan die film Hereafter nie meer in teaters vertoon word nie en die vrystelling van The Rite is tot ‘n latere datum uitgestel," het Warner Bros in 'n verklaring gesê.
- Vir meer inligting besoek BBC.
- Volg Nuus24 op Twitter.