Durrant vierde keer benoem
2010-01-07 07:53
Amanda Botha
Los Angeles - Die filmmaker Roberta Durrant het ’n vierde nominasie vir ‘n gesogte Emmy-toekenning – die Oscars van die internasionale televisiebedryf – ontvang wat haar tot in die finale ronde gebring het.
Sy en haar medevervaardiger, Portia Gumede, se produksiereeks Sokhula & Partners, wat vir die SABC vervaardig is, is in die drama-kategorie benoem en het onder die vyf beste produksies in die wêreld geëindig.
Sokhula & Partners is ‘n gedramatiseerde weergawe van sleutel hofsake wat in die Konstitusionele Hof verhoor is sedert die Suid-Afrikaanse grondwet in 1996 aanvaar is. Die ander genomineerde dramareekse wat ook in die eindronde om die Emmy meegeding het, was inskrywings van Mexiko, Suid-Korea, Denemarke en Brittanje.
Durrant is vir die eerste keer in 2004 vir ‘n Emmy benoem vir die gewilde komediereeks Stokvel. Daarna het sy ook in 2007 en 2008 ‘n benoeming ontvang vir haar reeks Home Affairs.
Meer as sestig lande is betrokke – uitgesluit die VSA – en vir die 2009 Emmys is 788 inskrywings uit 48 lande ontvang. Emmys word in vyftien kategorieë toegeken. Die Internasionale Akademie vir Televisie, Kuns & Wetenskap met sy hoofkantoor in New York doen die jaarlikse toekennings. Die Akademie word beskou as ‘n kulturele vertoonvenster van die beste wat vir die medium buite Amerika geskep word.
Jaarliks word ook spesiale toekennings gedoen om die prestasie van uitnemendheid van individue te vier. Sir David Frost is pas vereer vir sy uitsonderlike onderhoudstyl wat gelei het tot die skep van die rolprent Frost/Nixon.
- Die Burger