Drie akteurs groet 7 de Laan
2011-09-07 15:17
Kaapstad – Die bekende akteurs Hendrik Cronjé, beter bekend as Lukas, Sekoati Tsubane, beter bekend as Kabelo en Illse Roos, beter bekend as Isabelle, gaan die gewilde sepie 7 de Laan verlaat om nuwe loopbaangeleenthede aan te gryp, het vervaardigers van dié program op hul webwerf bekendgemaak.
Volgens Liby Nel, reklamekoördineerder, sal die karakter Lukas nog tot einde Oktober op die skerm te sien wees. Kabelo sal tot 1 November deel wees van die aksie, en Isabelle sal eers aan die einde van die eerste week in November groet.
Cronjé gaan eers vir tien dae toer na Thailand voordat hy aan ‘n groot projek begin werk. Meer besonderhede is egter nog nie bekend nie.
Volgens die webwerf het Tsubane en Roos ‘n bietjie meer tyd nodig om hulle loopbane as sangers sowel as akteurs te bevorder, en Roos wil graag meer tyd saam met haar kinders deurbring.
Tsubane gaan 'n CD met dansmusiek vrystel. Tien van die 12 snitte is oorspronklike liedjies waarvan hy self die lirieke geskryf het.
Al drie akteurs sal nog op ‘n vryskutbasis vir 7 de Laan beskikbaar wees.
– Volg Nuus24 op Twitter.
