Dr Phil se peperduur spogmotor gevind

2012-12-05 09:14

Los Angeles –  Die televisiepersoonlikheid Dr. Phil, wat bekendheid op Oprah Winfrey se kletsprogram verwerf het, is met sy gesteelde spogmotor herenig ná die polisie dit in Burbank, Kalifornië teruggevind het.

Die 1957 Chevrolet, wat $100 000 (sowat R880 000) werd is, is in Augustus by 'n werkswinkel gesteel waar herstelwerk aan die ratkas gedoen is.

Die voertuig het net geringe skade, en die polisie het volgens die skinderwebwerf TMZ verskeie verdagtes in hegtenis geneem.

Die polisie het in die proses glo ook 'n sindikaat oopgevlek wat klassieke motors by werkswinkels steel. Altesaam 14 motors is gevind.

"Hierdie is maar net die nuutste van 'n hele lys redes waarom ek nog altyd 'n groot ondersteuner van ons manne en vroue in die polisie was," het Dr Phil volgens die publikasie gesê.

– Lees hier meer.

– Volg Nuus24 op Twitter.