Dis ‘porno’, kla Kerkbode-leser
2010-11-21 11:43
Johannesburg - Op die voorblad staan ’n meisie met ’n effense glimlag.
Uit die
sigbare, ligroos ronding van haar boudjie kan mens aflei sy is heeltemal
kaal, maar mens sien nie veel meer nie, aangesien sy die grootste deel
van haar lyf agter ’n portret wegsteek.
Baie mense sal dié foto
op die voorblad van die tydskrif Pomp kuns noem. Pomp se uitgewer,
Hendrik Venter, noem dit ’n simboliese uitbeelding “van die durf,
deursettingsvermoë en sterk karakter van die Afrikanervrou”.
Maar
ten minste een persoon, wat haar slegs as “anonieme, geteisterde en
vernederde vrou” identifiseer, is so deur dié foto ontstel dat sy ’n
e-posveldtog begin het.
Pomp is ’n jaarlikse glanstydskrif met
kunsfotografie en dieptejoernalistiek en word deur die uitgewer Griffel
uitgegee. Griffel adverteer sy publikasies onder meer op die webwerf van
Kerkbode, lyfblad van die NG Kerk, en daar is gevolglik op Kerkbode se
webwerf ’n skakel na dié van Griffel.
En vir die “anonieme,
geteisterde vrou” was dié verband tussen ’n statige kerkkoerant en ’n
(volgens haar) kaalbastydskrif een te veel.
Sy het ’n
e-posveldtog begin waarin sy mense aanmoedig om die NG Kerk aan te kla
weens dié “bevordering van porno” en teen die afgelope week was dié
e-pos so wyd in omloop dat sowel Griffel as Kerkbode daarop gereageer
het.
In die e-pos kla die skrywer: “Wie het hierdie drek op
Kerkbode geplaas??????” Mense wat die e-pos ontvang, word aangemoedig om
dit uit druk en as protesgebaar in hul kerk se kollektebord te plaas.
Wat
haar luidens die e-pos verder ontstel, is dat mens van Kerkbode se
webwerf ook na die uitgewer Bybel-Media se webwerf kan navigeer. En van
daar kon jy nog vroeër die afgelope week navigeer na die sosiale netwerk
YouTube, waarop ’n uittreksel geplaas is van Bybel-Media se
opvoedkundige video LIG op tienerseksualiteit.
Wanneer daar ’n
video op YouTube geplaas word, genereer dié webwerf se sagteware
outomaties skakels na ander video’s met soortgelyke name. Aangesien LIG
op tienerseksualiteit die woord “seks” in sy titel bevat, kry enige
besoeker aan dié skakel dus outomaties die geleentheid om ook na ’n
klomp ander (beduidend minder Christelike) seksvideo’s te navigeer met
name soos “Dronk meisje in park” en “Effy and Cook sex scene 1”.
Dit
is onregverdig om Kerkbode of Bybel-Media vir dié klomp sekswebwerwe se
inhoud verantwoordelik te hou, kap Adri-Louise van Reenen,
departementshoof van die tydskrifmaatskappy, ’n afdeling van
Bybel-Media, terug.
“Omdat die video (LIG op tienerseksualiteit)
oor seksvoorligting gaan en ‘seks’ een van die sleutelwoorde in die
titel is, verskyn daar outomaties skakels na ander seksgerigte video’s
naas die Bybel-Media-video op YouTube. Dis ’n YouTube-funksie wat alle
materiaal geld wat daar geplaas word. Nóg Kerkbode nóg Bybel-Media het
enige beheer daaroor.”
Volgens haar kan mens dit vergelyk met
Christelike tydskrifte wat op ’n winkelrak langs pornografiese
tydskrifte geplaas kan word. Die uitgewer van die Christelike tydskrifte
het geen beheer daaroor nie.
Venter het ook van Griffel en Pomp
se kant die insinuasie dat Pomp of Kerkbode iets met pornografie te make
het, as “uiters onverantwoordelik, domastrant en lasterlik” afgemaak.