Dié jonges laat die dollars inrol
2012-07-13 11:50
Forbes se lys van hoogsbetaalde bekendes onder 30 word deur sangeres gedomineer, met die country-sensasie Taylor Swift wat heel bo-aan die lys is.
Die saketydskrif berig dat Swift die afgelope twaalf maande $57 miljoen (sowat R470 miljoen) verdien het. Swift was in die tydperk met die Noord-Amerikaanse- en Australiese been van haar wêreldtoer besig.
Forbes sê dat Swift met elke konsert $1 miljoen (sowat R8 miljoen) verdien het en dat multi-platinum CD-verkope en ander borgskappe haar totaal heelwat opgestoot het. Swift sal na verwagting in Oktober ‘n nuwe album vrystel.
Die tiener-sensasie Justin Bieber (18), die enigste man in die topvyf, is tweede op die lys met $55 miljoen (sowat R450 miljoen). Hy word gevolg deur die sangeres Rihanna met $53 miljoen (sowat R440 miljoen) en Lady Gaga, met $52 miljoen (sowat R430 miljoen).
Lady Gaga was verlede jaar bo-aan die lys met $90 miljoen (sowat R750 miljoen). Forbes sê sy het minder verdien omdat sy die afgelope jaar nie getoer het nie.
“Verwag maar dat die pop-prinses volgende jaar meer sal verdien,” het die tydskrif gesê.
Forbes het “album- en kaartjie-verkope, flieks, borgskappe en advertensie-werk” in ag geneem met die opstel van die lys.
Die tydskrif se toptien hoogsbetaalde bekendes onder 30 vir die tydperk 30 Mei 2011 to 30 Mei 2012 is:
1. Taylor Swift $57 miljoen (sowat R470 miljoen)
2. Justin Bieber $55 miljoen (sowat R450 miljoen)
3. Rihanna $53 miljoen (sowat R440 miljoen)
4. Lady Gaga $52 miljoen (sowat R430 miljoen)
5. Katy Perry $45 miljoen (sowat R370 miljoen)
6. Adele $35 miljoen (sowat R290 miljoen)
7. Kristen Stewart $34,5 miljoen (sowat R285 miljoen)
8. Lil Wayne $27 miljoen (sowat R225 miljoen)
9. Taylor Lautner $26,5 miljoen (sowat R220 miljoen)
10. Robert Pattinson $26,5 miljoen (sowat R220 miljoen)
– Volg Nuus24 op Twitter.
- AFP
