Die Antwoord: Vee jou af aan Malema
2011-03-20 14:12
Johannesburg - Die omstrede zef rap-groep Die Antwoord vee hulle letterlik af aan die politiek.
In die musiekvideo van hul nuutste treffer, Rich Bitch, gebruik Yo-Landi Vi$$er toiletpapier met Julius Malema se gesig daarop.
Die dubbellaag-toiletpapier word ook vir R35 verkoop op Die Antwoord se aanlynwinkel, Zefshop, met die opskrif: “Vee jou gat af aan politiek”.
Die omstrede video handel oor Vi$$er wat in armoede woon en dan haar ouers vermoor sodat sy as ’n “rich bitch” in weelde kan leef.
In die Malema-toneel in die video sit sy op ’n goue toilet met ’n goue broekie wat tot by haar kuite afgetrek is. ’n Halfnaakte man hou ook die Malema-toiletpapier vas wat sy van die rol af trek.
’n Debat oor Die Antwoord se video het ontstaan nadat Independent Online se webwerf vroeër die week daaroor berig het.
Van die kommentaar was: “Nou gaan die hondjies in die Jeugliga seker eis dat toiletpapier verbied word.”
Floyd Shivambu, die liga se woordvoerder, wou niks hieroor sê nie. “Omdat dit nie ’n politieke aangeleentheid is nie, is ek nie bereid om hieroor kommentaar te lewer nie. Moenie my tyd mors nie en moet my nooit weer oor so iets kontak nie,” het hy gesê.
- Rapport