Diana se niggie in Kaapse katgeveg
2011-01-16 14:31
Marlene Malan en Karin Burger
Kaapstad - Die seun van ’n skatryk Italiaanse konstruksiemagnaat en ’n jong vrou uit die Britse adelstand is nou in ’n hofstryd gewikkel nadat hulle glo handgemeen geraak het buite ’n Kaapse kitskosrestaurant.
Ricci Cinti (27), buurman van oudpres. FW de Klerk in die Kaapse spogbuurt Fresnaye, wou Saterdag niks sê oor die onderonsie tussen hom en lady Amelia Spencer (18) nie.
Haar pa is graaf Charles Spencer, wyle prinses Diana se broer.
Die voorval het op 29 Desember om 02:30 by McDonald’s in Groenpunt plaasgevind toe ’n huurmotor waarin Cinti ’n passasier was voor Spencer by die baan na die diensvenster vir motoriste ingedraai het. ’n Onbekende jong man was saam met haar.
Spencer het glo uit haar motor gespring en in ’n bekgeveg met Cinti betrokke geraak. Cinti was toe op krukke weens ’n sokkerbesering. Hy speel verdediger vir die Kampsbaai-span.
Cinti het gister baie vriendelik aan Rapport gesê hy sou graag wou praat, maar sy regspan het hom aanbeveel om nie kommentaar te lewer nie.
In ’n kort onderhoud met die Britse koerant The Sun het Cinti gesê dat Spencer “besope” en “buite beheer” was en dat sy beslis nie soos ’n dame opgetree het nie. Sy het teen die huurmotor geslaan en op hom gevloek.
Hy beweer ook dat hy uit die motor geruk en teen die grond geslaan is. Volgens The Sun het Cinti harsingskudding opgedoen en was sy kaak geswel. Hy is ook na ’n hospitaal geneem vir ’n breinskandering.
Spencer, een van ’n tweeling, en haar vriend het ná die voorval weggejaag, maar lede van die publiek het die registrasienommer neergeskryf en aan die polisie gegee.
Sy moet nou op 1 Februarie in die hof verskyn op ’n klag van aanranding.
Graaf Spencer het egter in die Britse media sy dogter se optrede verdedig deur te sê dat sy uit selfverdediging opgetree het. Hy het bevestig dat sy ook nou ’n klag teen Cinti gaan indien.
Cinti het wel aan Rapport ontken dat hy ’n vakman is, soos die Britse koerante beweer.
Cinti en sy broer, Danny, werk albei vir hul pa, Filippo Cinti.
Dié skatryk Italianer het in 1995 die reuse-konstruksiemaatskappy Filcon Construction gestig.
Cinti sr. word gereken as een van die grootste konstruksie-entrepreneurs in die land. Daar is reeds planne om die maatskappy verder in Afrika en ook na die Midde-Ooste uit te brei.
Ricci Cinti is nie skaam om op Twitter te vertel dat hy saam met die Kaapse elite uithang nie.
Hy word ook gereeld by Café Caprice in Kampsbaai gesien. Dis dieselfde kuierplek waar Lee-Ann Liebenberg en haar verloofde, Nicky van der Walt, onlangs op een aand R75 000 se sjampanje saam met ’n groepie vriende uitgekuier het.
Volg Nuus24 op Twitter.
- Rapport