DiCaprio maak stem dik oor ivoorhandel

2013-02-20 18:05

Bangkok – Die akteur Leonardo DiCaprio wil hê dat Thailand ivoorhandel moet verban as deel van ‘n wêreldwye veldtog om misdade in die natuur in die wiele te ry.

Die Wêreldnatuurfonds (WWF) het Woensdag saam met die akteur in ‘n verklaring mense aangemoedig om ‘n petisie te teken wat daarop aandring dat die premier Yingluck Shinawatra ivoorhandel moet verban en sodoende Afrika- en Asiatiese olifante van stropery red.

Dit is onwettig om in Thailand die ivoor van ‘n Afrika-olifant te verkoop, maar die ivoor van makgemaakte olifante kan wel wettiglik mee handel gedryf word.

Aktiviste beweer dat hierdie skuiwergat stropers aanmoedig om ivoor uit Afrika onwettig na Thailand in te voer.

"Die olifantbevolking is in gevaar om uitgewis te word as ons nie dadelik aksie neem om hierdie onwettige handel stop te sit nie,” het DiCaprio in die verklaring gesê.

Die 38-jarige DiCaprio is ‘n bekende aktivis en dien ook op die WWF se raad.

– Volg Nuus24 op Twitter
 

- AP