Demi uit hospitaal ontslaan
2012-01-27 13:02
Los Angeles – Demi Moore is uit die hospitaal ontslaan.
Die aktrise is Maandagaand na ‘n hospitaal gehaas nadat sy glo ‘n aanval gehad het tydens ‘n verjaardagpartytjie wat sy by haar huis gehou het.
E! News het berig dat sy nie meer by die Sherman Oaks-hospitaal in Kalifornië behandel word nie.
Nietemin is dit nie duidelik wanneer Demi, wat Dinsdag deur haar dogter Rumer by die fasiliteit besoek is, die hospitaal verlaat het nie.
Die 49-jarige aktrise het in November van Ashton Kutcher, met wie sy ses jaar getroud was, geskei nadat hy daarvan beskuldig is dat hy haar verneuk het.
Demi se woordvoerder het nadat sy in die hospitaal opgeneem is, aangevoer dat die aanval veroorsaak is deur stres en het beweer dat sy vir uitputting behandel word.
“As gevolg van die stres in haar lewe op die oomblik het Demi gekies om professionele hulp te ontvang om haar uitputting te behandel en haar algehele gesondheid te bevorder,” het haar woordvoerder gesê.
“Sy sien daarna uit om beter te word en is dankbaar vir die ondersteuning van haar familie en vriende.”
Nietemin is daar ook beweer dat Moore as gevolg van anoreksie en dwelmmisbruik gehospitaliseer is.
Daar word nou beweer dat die Striptease-ster Adderrall – ‘n amfetamien, sout-gebaseerde medikasie wat slegs wettig is in die VSA en Kanada – gebruik het.
Dié medikasie word gebruik om aandagafleibaarheidsindroom en narkolepsie te behandel.
“Demi het Adderall gebruik en drink energiedrankies en honger haarself uit en dit is van die ernstige oorsake wat daartoe gelei het dat sy Sondagaand ineengestort het,” het ‘n bron aan RadarOnline.com gesê.
“Die pille en uithongering het Demi vernietig en dit is al vir omtrent ‘n jaar ‘n probleem.”
– Volg Nuus24 op Twitter
- BangShowBiz