Darryl Hannah in hegtenis geneem
2012-10-05 18:05
San Antonio – Die aktrise Darryl Hannah is Donderdag in Texas in hegtenis geneem nadat sy voor ‘n stootskraper gaan staan het wat grond verskuif het vir die omstrede Keystone XL-oliepyplyn.
Die betoging het net buite Winnsboro, Texas plaasgevind, het Hannah se agent, Paul Bassis, gesê.
Die 51-jarige Hannah, ‘n jare-lange omgewingsaktivis, is verlede jaar ook buite die Withuis in hegtenis geneem tydens ‘n betoging oor die Keystone XL-oliepypleiding wat volgens beplanning deur verskeie Amerikaanse state van Kanada na die Golf van Mexiko sal loop.
Saam met Hannah was die eiendom se eienaar, die 78-jarige Eleanor Fairchild, wat haar grond weens die projek verloor het.
“Hannah en Fairchild wou Fairchild se eiendom teen TransCanada beskerm,” het Bassis gesê.
Volgens polisiebeamptes is Hannah aangehou vir aanklagte op onregmatige betreding en verset teen arrestasie.
Verteenwoordigers vir TransCanada kon nie bereik word nie, maar ‘n verklaring van die maatskappy sê dat die oliepyplyn veilig sal wees.
Hannah, wat bekend is vir haar rolle in flieks soos Splash en Kill Bill, is ook in 2006 en 2009 in hegtenis geneem omdat sy haar teen verskeie ander omgewingsake verset het.
– Volg Nuus24 op Twitter
- Reuters
