Darren in sop oor beweerde rassistiese uitlatings
2011-09-07 07:01
Johannesburg – Darren Scott, aanbieder van Jacaranda 94.2 se Just Plain Breakfast-program, is in die pekel oor beweerde rassistiese uitlatings by die radiostasie se jaarlikse spanbou-byeenkoms.
Scott het glo Vrydag laataand in ’n kroeg by Mabula Lodge by Bela-Bela (Warmbad) rassistiese opmerkings teenoor ’n vroulike kollega gemaak. Hy het glo gevloek en geskree, het twee onafhanklike ooggetuies vertel.
Jacaranda 94.2 het sy jaarlikse spanbou daar gehou.
Jenny Griesel, woordvoerder vir die radiostasie, het bevestig dat ’n saak van wangedrag teen Scott ondersoek word.
“Jacaranda 94.2 is daarvan bewus dat ’n klag teen Darren Scott aanhangig gemaak is,” het sy in ’n verklaring gesê.
Griesel wou nie uitwei oor die aard van die klag nie en kon nie sê wanneer die ondersoek voltooi sal word nie.
Scott saai nie vandeesweek uit nie, maar volgens Griesel het die stasie vooraf onderhandel om hom ’n week kans te gee om voor te berei vir die Rugbywêreldbeker-uitsendings.
“Hy is dus nie van die lug af omdat hy geskors is nie.”
Volgens Griesel sal die stasiebestuur besluit of Scott volgende week weer mag uitsaai as die ondersoek langer as ’n week duur.
Hy is glo voorheen ook op die vingers getik omdat hy op ’n medewerker geskel en geskree het.
Volgens ’n derde onafhanklike bron, ’n voormalige kollega van Scott wat ook onder dié se tong deurgeloop het, is hy sowat ’n jaar gelede met etlike duisende rande beboet en vir ’n tyd geskors ná wangedrag teenoor ’n klankman.
Griesel kon dié voorval teen druktyd nie bevestig of ontken nie.
Scott het nie Dinsdag op navrae gereageer nie.
– Volg Nuus24 op Twitter
- Beeld
