Darling-fees floreer selfs sonder Nederlandse borgskap
2010-09-02 08:43
Kaapstad - Die Voorkamerfest in Darling word vanjaar gehou sonder die hulp van ’n groot borg, maar met uitstekende kaartjieverkope.
Al die kaartjies vir die fees vanjaar is reeds op 2 Augustus uitverkoop.
“Ons het ’n benoude tyd beleef met die borgskap van die Nederlanders wat aan die einde van verlede jaar ten einde geloop het. Hulle sou die fees aanvanklik vir drie jaar geborg het en was uiteindelik vyf jaar betrokke. Hulle kon nie verder help nie, maar Wim Visser het wel verskeie kleiner bedrae vir ons help beding,” het die koördineerder van die fees, Tasha St John Reed, gesê.
Die Voorkamerfest word eerskomende naweek die sewende keer gehou.
Die konsep van gehore wat ’n verskeidenheid opvoerings en uitvoerings in die gesellige atmosfeer van mense se voorhuise bywoon, het van die eerste fees af byval gevind.
Verlede jaar het meer as 2000 mense die fees besoek. Daar was by die 60 kunstenaars wat in 21 voorkamers opgetree het.
Vir die laatslapers is daar egter geen troos vanjaar nie. Hulle sal maar net kan kwyl oor die meer as 20 interessante stukke wat deel uitmaak van die program.
Van die kunstenaars wat vanjaar optree, is Andisiwe Mbunje van Khayelitsha wat in Uchulumanco meer vertel van die lief en leed in ’n klein Oos-Kaapse dorpie, die Fleur du Cap-wenners Fiona du Plooy, Candice D’Arcy, Jamie Jupiter en Gene Kiermane met ’n satiriese kyk na country-musiek in Angels on Horseback, Bernard Loonen van Nederland met die program Songs of travel, Gaëtan Schmid, met ’n verkorte weergawe van sy eenpersoonstuk Rumpsteak, Guy Buttery se Indlovu People (’n gesinsproduksie oor olifante), en die Matzer-theaterproduksies van Nederland se 111 waarin die akteurs en musikante Jasper Boeke en Helge Slikker te sien is ’n moderne feëverhaal van twee mans met ’n groot opdrag.
Daar is baie musiek met onder meer die a capella-ensemble Not the Midnight Mass en Philip de Villiers en die Blinde Boere Orkes.
Volgens St. John-Reid is hulle verstom oor die flink verkoop van die kaartjies.
- Die Burger