DJ Ossewa se 'Raapie' gegroet
2010-09-07 07:09
Johannesburg. – DJ Ossewa bestaan voortaan net uit drie lede.
“Ons is nie van plan om ’n ander kunstenaar in Dwayne se plek te kry nie, want daar is net een Raapie,” het Marnus Bisschoff, DJ Ossewa se bestuurder, gister gesê.
Familie en vriende het in die NG kerk Spioenkop in Walkerville, suid van Johannesburg, van Dwayne Venter (21), oftewel Raapie Knapie, afskeid geneem.
Die kleurbaadjie wat hy as Raapie op die verhoog gedra het, het op sy kis gelê.
Venter is op 29 Augustus dood toe die bussie waarin DJ Ossewa gery het op die N4-snelweg naby Brits teen ’n VW Polo gebots het. Hy was die enigste kind van Mike en Venessa Venter.
Die oorblywende drie DJ Ossewa-lede – Jerbes de Bruyn (Die Leeuboer), Riaan van Wyk (Daniel Jakobus Ossewa) en Pieter Rischmüller (Piet Pompies) – het huldeblyke aan Venter gebring.
Venter en sy vriendin, Maresa Bothma (23), was van plan om in Desember verloof te raak.
- Die Burger